top of page
  • Hans Lüthi

Vo Magier und Fee

"Es gibt mehr zwischen Himmel und Erde, als wir mit unserem Verstand erkennen können" Laotse







Määrliwäut?


Was für es Glück, de kenne glehrt z‘ha.


Du bisch es ganz bsunders Wäse. Eis vo der Sorte, wo mim Gfühl a Iiblick het i Wälte, wo mer Erwachsene gärn als Määrliwäut belächle. Derbi weiss i ganz genau, dass es vieles git, wo mer Mönsche mit üsne Ohre und üsne Ouge nid chöi gseh. Und trotzdäm isch es da. Und es macht öppis. Es spielt e Rolle. Es het e bedütig. I weiss das – und es macht mi still und ou aadächtig. Und neugierig…


Rauhnächt und auti Brüüch

Jetzt grad bispiuswyys die Rauhnächt. E bsunderi Zyt, wo ni (no nid) viu drüber weiss. Aber i gseh, wie Du da öppis mit viel Inbrunscht und Härz zelebriersch. Es het e fiirlechi, gheimnisvolli Usstrahlig. Wo uf me azziehend würkt. Isch gläbti Erinnerig a ganz auts Wüsse und ganz auti Brüch. E reschpäktvolli Öffnig für die aute Mächt, wo hinger dene Brüüch läbig si und öppis z'mäude hei. Oder wo üs eifach a grundsätzlechs wei erinnere, wo me i der düredräjte Hektik und uf Konsum iigschworene Gsellschaft eifach völlig us den Ouge verlore het. Fiinstofflechs, es Gfüehl für Rythmus, Bsinnig uf natürlechi Abläuf, s'Vertroue und d'Verbundeheit uf Intelligänz, wo über üsere steit und wo's guet meint mit üs. D'Weisheit, wo hinger em Aahalte steit: Das machts möglech, der Chopf uf em Haus z' dräje. Da isch de es völlig angers Luege möglech aus das, wo mit em Blick nach vorne uf der Outorennbahn ufzwängt wird.

Isch de das alles?


Ja. ig wirde nid müed, hinger em Läbe viu meh z'vermuete, aus das, wo n'ig bis jetzt entdeckt ha. I gloube, s'meischte vo däm, wo ni bis jetzt kenne glernt ha, cha me mit Fug u Rächt aus Oberflächi bezeichne. Es isch, e dünni, sphärischi Schicht mit eme Horizont, wo eim wott gloube mache, es sigi nume denn guet im Läbe, we me s'Glück pachtet heig. Und derbi a viu dänkt, wo me mit Gäud cha chouffe.

Derbi git's über üses Läbe use so viu Sache, wo äuter si. Wo i me ne grössere Zämehang stöi. Wo ne Bedütig hei, wo üsi paar Jährli überstiige. Es git Lüt, wo genau wei wüsse, was "hinger em Vorhang" isch. Hinger em Tod zum Bispiel. I ghöre nid zu däne. I ha Vorstellige, aber i muess säge, dass i nid so viel drüber nachedänke. Oder nümm so viel. I Interessiere mi ender meh für das bitzli Läbe, wo mer no blibt. Und da interessiere mi anderi "Vorhäng" scho echli meh weder d'Schwelle zum Tod und was ächt nachär no isch.


Stoff zum Sinniere

Zum Bispiel, wie d'Liebe i mer meh Ruum cha gwinne. Und d'Dankbarkeit. Wie ni läbesverhinderndi Ängscht cha los lah. Und meh Vertroue cha is Läbe la - zäme mit der Liebi. Ja - und wenn ig da vo Vertroue rede: Vertroue i was? Und zu wäm? Und wie gnau muess ig ächt die Adrässe überhoupt kenne? Das si so Frage, wo mi beschäftige. Nid chramnpfhaft, nei, meh eso, dass ig immer echli parat bi derfür. So uf ne Art uf Standby: Wenn mer gueti Gedanke und villech sogar Antworte zu settigne Frage zue-falle, dass ig se im Flug cha abfange.


Periskop usfahre


I gloube, dass ig uf eme guete Wäg bi, meh z'erfahre i dere Richtig. I ha d'Antenne dusse. Und met Dir zäme unterwägs z'si frisiert das alles zäme no uf ne gueti Wys. Das isch mega schön. I möcht der Chopf gärn us dere dünne sphärische Schicht use ha. So ne Art geischtigs Periskop isch ja scho ne vielversprächende Aafang. Möcht gärn integriere, was da würklech vo Bedütig ume isch. Es isch a der Zyt...

18 Ansichten0 Kommentare

Aktuelle Beiträge

Alle ansehen

Comments


bottom of page